ການນຳໃຊ້ນໍ້າໃຕ້ດິນ ໃນນະຄອນຫລວງວຽງຈັນ

ໃນນະຄອນຫຼວງວຽງຈັນ ໃນປີ 2017 ປະກອບມີທັງໝົດ 9 ເມືອງ ເຊັ່ນ: ເມືອງຈັນທະບູລີ, ເມືອງສີໂຄດຕະບອງ, ເມືອງໄຊເສດຖາ, ເມືອງສີສັດຕະນາກ, ເມືອງນາໄຊທອງ, ເມືອງໄຊຖານີ, ເມືອງຫາດຊາຍຟອງ, ເມືອງປາກງື່ມ ແລະ ເມືອງສັງທອງ. ໃນນີ້, ມີທັງໝົດ 481 ບ້ານ, ມີປະຊາກອນທັງໝົດ 803,307 ຄົນ. ຂໍ້ມູນຈາກສາທາລະນະສຸກນະຄອນຫລວງວຽງຈັນ ມີປະຊາກອນນໍາໃຊ້ນໍ້າປະປາ ທັງໝົດ 503,136 ຄົນ,​ ນໍາໃຊ້ນໍ້າບາດານ 200,714 ຄົນ ແລະ ນໍ້າໃຊ້ນໍ້າສ້າງ 102,635 ຄົນ. 

ຈາກຂໍ້ມູນ ໃນປີ 2017 ພະແນກສາທາລະນະສຸກ ນະຄອນຫລວງວຽງຈັນ, ໃນນະຄອນຫລວງວຽງຈັນ ມີເມືອງຈັນທະບູລີ ແລະ ເມືອງສີສັດຕະນາກ ທີ່ນໍາໃຊ້ນໍ້າປະປາ 100%. ເມືອງໄຊທານີ ມີປະຊາກອນທົງໝົດ 198,641 ຄົນ, ປະຊາກອນນໍາໃຊ້ນໍ້າປະປາ 81,205 ຄົນ, ນໍາໃຊ້ນໍ້າບາດານ 58,899 ຄົນ ແລະ ນໍາໃຊ້ນໍ້າສ້າງ 58,537 ຄົນ. ເມືອງປາກງື່ມ ມີປະຊາກອນທັງໝົດ 52, 969 ຄົນ  ເປັນເມືອງທີ່ເຂົ້ານໍ້າປະປາໜ້ອຍກ່ວາໝູ່ ຊຶ່ງມີປະຊາກອນເຂົ້າເຖິ່ງນໍ້າປະປາພຽງແຕ່ 6,905 ຄົນ ສໍາລັບ ການນໍາໃຊ້ນໍ້າບາດານ ແມ່ນ 36,880 ຄົນ ແລະ ນໍາໃຊ້ນໍ້າສ້າງ 8,850 ຄົນ. 

ຈາກການລົງສໍາຫລວດການນໍາໃຊ້ນໍ້າໃຕ້ດິນ ໃນປີ 2019 ຫາ 2020 ໄດ້ສັງເກດເຫັນວ່າ ປະຊາຊົນທີ່ນໍາໃຊ້ນໍາສ້າງ ແລະ ນໍ້າບາດານ ເພື່ອອຸປະໂພກ ແມ່ນຈະນຳໃຊ້ນໍ້າໂດຍກົງ ຊຶ່ງບໍມີການບໍາບັດນໍ້າກ່ອນໃຊ້ ຊຶ່ງນັ້ນແມ່ນເຮັດໃຫ້ມີຄວາມສ່ຽງຈະນໍາໃຊ້ນໍ້າສ້າງ ແລະ ນໍ້າບາດານທີ່ປົນເປື້ອນ. ເພາະບັນຫາຫລັກຂອງນໍ້າໃຕ້ດິນໃນຕົວເມືອງນະຄອນຫລວງວຽງຈັນ ແມ່ນບັນຫາການປົນເປື້ອນທີ່ເກີດຈາກການລະບາຍນໍ້າອອກຈາກຄົວເຮືອນ ໂດຍສະເພາະແມ່ນລະບົບນໍ້າເສຍຈາກຫ້ອງນໍ້າ, ສານເຄມີຕົກຄ້າງຈາກການໃຊ້ ຢາຂ້າຫຍ້າຈາກການເຮັດກະສິກຳ ແລະ ອື່ນໆ. ໃນບາງແຫ່ງ ກໍມີບັນຫາ ກ່ຽວກັບ ນໍ້າເຄັມ ເຊັ່ນ ບ້ານບໍ່ນາງົວ, ບ້ານທົ່ງມັ່ງ ແລະ ອື່ນໆ. ນອກຈາກນີ້, ການນຳໃຊ້ນໍ້າບາດານ ຫຼື ນໍ້າສ້າງ ສ່ວນຫລາຍແມ່ນຈະມັກພົບກັບບັນຫານໍ້າຄໍາ ຫຼື ນໍ້າທີ່ມີແມັກການິກ (ທາດເຫລັກ) ທີ່ປົນຢູ່ກັບນໍ້າ. ດັ່ງນັ້ນ,​ ມັກເຮັດໃຫ້ຜູ້ທີ່ນໍາໃຊ້ນໍ້າທີ່ບໍຜ່ານການບໍາບັດມັກເກີດບັນຫາຜິວແພ້ນໍ້າ ຫຼື ມີຄາບຕະກອນ. ການນຳໃຊ້ານໍ້າບາດານ ຫຼື ນໍ້າສ້າງ ທີ່ໃຊ້ຈັກໂປ້ມນໍ້າ ຊຶ່ງພາໃຫ້ເກີດມີແມັກການິກ ນຳນໍ້າທີ່ໃຊ້. ດັ່ງນັ້ນ,​ປະຊາຊົນທີ່ຕ້ອງການນໍາໃຊ້ນໍ້າບາດານ ຫຼື ນໍ້າສ້າງ ຈຳເປັນຕ້ອງມີການກ່ອງນໍ້າກ່ອນໃຊ້ ຖ້າເປັນໄປໄດ້ແມ່ນຕ້ອງມີການຂ້າເຊື້ອດ້ວຍຄຼໍຣິນ ກ່ອນຈະນຳໃຊ້ນໍ້າ ແມ່ນຈະດີທີ່ສຸດ 

ແຫຼ່ງຂໍ້ມູນ:

1. ພະແນກສາທາລະນະສຸກ ນະຄອນຫລວງວຽງຈັນ.​

2. Noda, K. Makino T. Kimura, M. Douangsavanh S and Keokhampphui K. Hamada H. Iida, T and Oki K. (2017). Domestic Water Availability in Vientiane, Laos PDR -The Water Quality Variation in the Rainy Season. The University of Tokyo, Japan.